METEOR зымыранын F-35 ұшағына біріктіру бағдарламасы аясында алғашқы ажырату сынағы өтті. Зымыран 7 қазанда АҚШ-та F-35B ұшағының ішкі қару бөлімінен түсірілді.
Сынақ зымыранның ұшақтан қалыпты жағдайда немесе төтенше тоқтату кезінде қауіпсіз ажырауын тексереді. Бұл оның фюзеляжға немесе қанат құрылымына соғылмауын және ұшақтың ұшу динамикасына әсер етпеуін бағалауға мүмкіндік береді.
Сынақ кезінде күрделі аэродинамикалық ортада зымыранның қауіпсіз ажырауы көрсетіліп, қаруды жіберу сипаттамаларын болжауға арналған цифрлық модельдерді жетілдіруге қажетті деректер жиналды.
Алдағы айларда METEOR зымыраны әртүрлі жіберу режимдерінде сынақтан өтеді. Бұл жұмыстар қауіпсіз ажырауды растауға, кейін зымыранды нақты ұшыру сынақтарына жол ашуға тиіс.
Сынаққа арналған зымыранды Ұлыбритания және АҚШ F-35 интеграциялық тобы дайындап, ұшаққа орнатты. Оның құрамына Корольдік Әскери-теңіз күштері, Корольдік Әуе күштері және Lockheed Martin қызметкерлері кірді.
Сынақты Әуе және ғарыштық соғыс орталығына бекітілген Корольдік Әскери-теңіз күштерінің F-35 сынақ ұшқышы орындады. Жобаға Ұлыбритания Қорғаныс министрлігі, АҚШ Қорғаныс министрлігі, Италия Қорғаныс министрлігі, Lockheed Martin, BAE Systems, MBDA және Northrop Grumman да қолдау көрсетті.
MBDA мәліметінше, интеграция жұмыстары Ұлыбритания мен Италияның жауынгерлік авиация мүмкіндіктерін дамытуға, әуе-әуе қаруы нұсқаларын көбейтуге және жауынгерлік әлеуетін арттыруға үлес қосады.
