Украина Қорғаныс министрлігінің Бас барлау басқармасы War&Sanctions порталында ресейлік «Герань-5» ұшқышсыз аппаратының К5-К модификациясына қатысты мәлімет пен интерактивті 3D-модель жариялады. Зерттелген үлгіден шетелде өндірілген 93 электрондық компонент анықталған.
Барлау қызметінің мәліметінше, Ресей бұл модификацияны биыл күздің басында Украина қалаларына соққы жасау үшін қолдана бастаған. Қанатының аэродинамикалық сызбасы мен тактикалық-техникалық сипаттамаларына қарай аппаратты шағын қанатты зымыран қатарына жатқызуға болады.
К5-К-ның ұзындығы 4 метр, қанатының құлашы 3 метр. Салыстыру үшін, кәдімгі «Герань-5»-тің ұзындығы 6,5 метр, қанатының құлашы 3,2 метр. Ұшу биіктігінің шекті деңгейі 5-тен 6 шақырымға дейін артқан, ал крейсерлік жылдамдығы сағатына 450 шақырымнан асады; жекелеген маневр кезінде ең жоғары жылдамдығы сағатына 1000 шақырымға жетуі мүмкін. Ұшу қашықтығы 1000 шақырым, жауынгерлік бөлігінің салмағы 90 килограмм болып қалған.
Зерттелген үлгіде ТББЧ-90 термобарикалық жауынгерлік бөлігі болған. Оның авионикасы «Герань-4 Сикер» аппаратының соңғы нұсқаларындағы жүйелерге ұқсас, соның ішінде «SADRA seeker» инерциялық навигация жүйесі мен «МОХ» модулі бар.
Аппарат «Сусанин» атты жаңа оптикалық-электрондық корреляциялық жүйемен жабдықталған. Жүйе камерадан алынған кескінді микрокомпьютер жадындағы үлгімен салыстырып, ұшу бағытының сәйкестігін қамтамасыз етеді. Зерттелген К5 үлгісінде жүйеге оптикалық датчиктердің орнына қос диапазонды камера қосылған.
Барлау басқармасы анықтаған 93 электрондық компоненттің 52-сі АҚШ өндірушілеріне, ал 10-нан Қытай және Швейцария өндірушілеріне тиесілі. Қызмет Ресейдің қолданылған электрондық компоненттердің таңбаларын, оның ішінде Texas Instruments цифрлық сигнал процессорлары мен Murata инерциялық модульдерін жасыруға тырысатынын хабарлады.
ГУР мәліметінше, Ресейге қарсы санкциялар жеткізу тізбектерінде қиындық туғызып, шығындарды, жеткізу мерзімдерін және іркіліс қаупін арттырып отыр.
