Ақ үй АҚШ президенті Дональд Трамптың 20 қазанда Солтүстік Каролинаға оралатынын хабарлады. Әкімшілік мәлімдемесінде штатта қылмыс азайып, жұмысшылар мен зейнеткерлерге салық жеңілдіктері берілгені және өндіріс саласына инвестициялар артқаны айтылған.
Ақ үй дерегінше, 2026 жылдың алғашқы жартысында Солтүстік Каролинада қылмыстың төрт негізгі санатының бәрі өткен жылдың сәйкес кезеңімен салыстырғанда төмендеген. Адам өлтіру 12,4%-ға, тонау 18%-ға, көлік ұрлығы 23%-ға азайған. 2025 жылы штатта адам өлтіру 18%-ға, көлік ұрлығы 21%-ға, тонау 20%-ға, ауырлататын мән-жайлардағы шабуыл 14%-ға төмендеген.
Шарлоттада 2025 жылы жалпы қылмыс 9%-ға, зорлық-зомбылық қылмыстары 21%-ға азайған. 2026 жылдың алғашқы жартысында жалпы қылмыс тағы 16%-ға, зорлық-зомбылық қылмыстары 8%-ға, мүлікке қарсы қылмыстар 17%-ға төмендеген. Роли қаласында биылғы екінші тоқсанда зорлық-зомбылық және мүлікке қарсы қылмыстар азайып, адам өлтіру 33%-ға төмендеген. Уилмингтонда 2025 жылы жалпы қылмыс 16%-ға азайған.
Ақ үй мәлімдемесінде қылмыс үшін сотталған бес адамның ұсталғаны да айтылған. Олардың үшеуі Ролиде, біреуі Лоринбургте, біреуі Шарлотта, тағы біреуі Уилмингтон маңында ұсталған; мәлімдемеде олардың шығу тегі және сотталған қылмыстары көрсетілген.
Әкімшілік Солтүстік Каролинадағы шамамен 1,9 миллион зейнеткерге жаңа салық шегерімі қолданылатынын хабарлады. Штатта салық қайтарымының орташа мөлшері 3 542 доллар болған. Ауылдық денсаулық сақтау бағдарламасы алғашқы жылы 213 миллион доллар қаржы алып, үш миллионнан астам тұрғынға және 400-ден астам медициналық мекемеге қолдау көрсетеді; алдағы бес жылда штат шамамен 1 миллиард доллар алуға үмітті.
Ақ үй бірқатар компанияның штаттағы инвестицияларын атап өтті. Amazon Ричмонд округінде бұлтты есептеу және жасанды интеллект инфрақұрылымын кеңейтуге 10 миллиард доллар салып, кемінде 500 жұмыс орнын ашпақ. JetZero Гринсборода ұшақ зауытын салуға 4,7 миллиард доллар бөледі; мәлімдемеде шамамен 14 560 жұмыс орны ашылатыны айтылған. Johnson & Johnson, Genentech, Biogen, AbbVie, Prysmian, Vaxcyte, Merck, US Forged Rings, Novartis, STERIS және Coinbase те инвестициялары мен жоспарларын жариялаған.
Мәлімдемеде жиһаз өндірісін қорғау үшін импортталатын ағаш өнімдеріне баж енгізілгені, 2025 жылы Форт-Брэгг әскери базасының бұрынғы атауы қалпына келтірілгені айтылған. Сондай-ақ «Хелен» дауылынан кейін қалпына келтіруге 7,5 миллиард доллардан астам федералдық көмек және қосымша 858 миллион доллар бөлінгені, Лумби тайпасына федералдық тану берілгені көрсетілген. Ақ үй әкімшілік пен республикашылдардың саясатын оң бағалап, саяси үндеумен аяқтаған.
