Щучинскіде қысқы спорт түрлері бойынша олимпиадалық даярлау орталығының үшінші кезегінің құрылысы басталды. Жоба аясында төрт оқу-жаттығу трамплині, 300 орындық мамандандырылған мектеп-интернат және 3 мыңға жуық көрерменге арналған жабық мұз айдыны салынады.
Ақмола облысының әкімі Марат Ахметжанов құрылыс барысымен және алдағы жоспарлармен танысты. Болашақта орталықта қысқы спорт түрлері бойынша ұлттық құрамалар халықаралық жарыстар мен Олимпиада ойындарына дайындалады.
Кешеннің тұжырымдамасы оқу, кәсіби даярлық және спортшыларды қалпына келтіру үдерістерін бір ортаға біріктіреді. Сондай-ақ оқытушылар құрамына арналған тұрғын корпус пен инженерлік инфрақұрылым нысандары салынады.
