Еуразиялық даму банкі (ЕАБР) мен «Еуразиялық банк» АҚ инвестициялық жобаларды синдикатталған кредиттеуді ұйымдастыру бойынша стратегиялық ынтымақтастық туралы келісті. Оның ішінде энергетика саласындағы ірі жобаларды қаржыландыру қарастырылған.
Меморандумға 10 қарашада Абу-Дабиде, ЕАБР-дің Абу-Даби жаһандық нарық қаржы орталығындағы (ADGM) кеңсесінің ашылуына орай өткен іс-шарада қол қойылды. Іс-шараға Біріккен Араб Әмірліктері Қаржы министрлігінің өкілдері қатысты.
ЕАБР басқарма төрағасының орынбасары Руслан Даленов меморандум Қазақстан экономикасын дамытуға бағытталған ірі жобаларды, соның ішінде энергетика жобаларын бірлесіп қаржыландыру үшін тараптардың қаржы мүмкіндіктері мен тәжірибесін біріктіруге арналғанын айтты.
ЕАБР Қазақстанның «Көмір генерациясын дамыту» ұлттық жобасы аясында Орталық және Шығыс Қазақстандағы энергетикалық жобаларды жүзеге асырып жатыр. Құрылыс жүргізіліп жатқан электр станцияларында Қазақстанның Экологиялық кодексі талаптарына сай заманауи технологияларды қолдану көзделген. ЕАБР энергетика портфелінің елеулі бөлігін жаңартылатын энергия көздері жобалары құрайды.
«Еуразиялық банк» басқарушы директоры Назар Мамыканов меморандум ірі инвестициялық жобаларға, соның ішінде синдикатталған кредиттеу қағидаттары бойынша қатысуға қосымша мүмкіндіктер беретінін айтты. Құжат басқа инвестициялық жобаларды синдикатталған және банкаралық кредиттеу бойынша өзара іс-қимылды да қамтиды; олардың қатарында ЕАБР қатысатын инвестициялық қорлар арқылы іске асырылатын жобалар бар.
