Қаржы нарығын реттеу және дамыту агенттігі мен Ұлттық банктің басшылығы екінші деңгейлі банктердің жетекшілері және Қазақстан қаржыгерлерінің қауымдастығымен кездесті.
Кездесуде Қазақстан халқына Жолдауында айтылған экономиканы кредиттеу және капитал нарығының мүмкіндіктерін кеңейту жөніндегі Мемлекет басшысының тапсырмаларын орындау, сондай-ақ қаржы секторының өзекті мәселелері талқыланды.
Тараптар банктердің бизнеске инвестициялық кредит беруін кеңейту үшін реттеушілік жағдай жасау қажеттігін атап өтті. Бұл «Халықтық құрылыс» бағдарламасы және «Энергетикалық және коммуналдық секторларды жаңғырту» ұлттық жобасы аясындағы кредиттеуді де қамтиды.
«Капитал нарығы туралы» заң жобасына жеке кәсіпорындарды биржалық құралдарды белсенді пайдалануға ынталандыру, қосымша қаржы көздерін жұмылдыру және инвестициялық тәртіпті күшейту тетіктерін енгізуге назар аударылды.
Кездесудің жеке бөлігі цифрлық активтер нарығы мен токенизацияны дамытуға, оларды реттеудің теңгерімді тәсілдерін қалыптастыруға және Қазақстан рейтинг агенттігінің қызметіне арналды.
Кездесу қорытындысында тараптар өзара іс-қимылды одан әрі нығайтуға дайын екенін растады. Бірлескен жұмыс бизнесті қаржыландыруды кеңейтуге, капитал тартудың балама арналарын дамытуға және цифрлық активтер нарығының орнықты дамуына жағдай жасауға бағытталады.
