Қазақстан Қарулы күштері Арнайы операциялар күштерінің әскери қызметшілері аралас жекпе-жектен Қазақстан чемпионатында үш алтын және бір күміс медаль жеңіп алды. 22–25 қазан аралығында Астанада өткен жарыста «Жаубасар» командасының барлық төрт спортшысы ұлттық құрамаға енді.
Чемпионатқа аймақтық федерациялардың іріктеуінен өткен спортшылар қатысты. Олар әртүрлі жас санатында Traditional және Modern тәртіптері бойынша сынға түсті.
Еламан Куатов, Абдурахман Өмірзақов және Аян Тұрсын Қазақстан чемпионы атанды. Жұлдызай Ибраева күміс медаль жеңіп алды.
Әскери спортшылар бұған дейін де елдік және халықаралық жарыстарда жетістікке жеткен. 2026 жылғы қаңтарда сержант Еламан Куатов Қытайда өткен аралас жекпе-жектен Азия чемпионатында 120 келіге дейінгі салмақта жеңімпаз атанды. Ол Тайпей, Қытай және Өзбекстан спортшыларын жеңді.
Биыл сәуірде Қарағандыда өткен қоян-қолтық ұрыстан Қазақстан чемпионатында Аян Тұрсын 53 келіге дейінгі салмақта алтын, ал Жұлдызай Ибраева 58 келіге дейінгі санатта қола медаль алды. Сол жарыста Еламан Куатов та қола жүлдегер атанды.
Қазан айындағы ММА чемпионаты алдағы халықаралық жарыстарға ұлттық құраманы жасақтау үшін іріктеу кезеңі болды. «Жаубасар» командасының төрт әскери қызметшісі аралас жекпе-жектен әлем чемпионатында Қазақстан атынан өнер көрсету құқығына ие болды.
