«Сырым» ветеринариялық бақылау бекетінде Ресей Федерациясынан әкелінген тауық жұмыртқаларының ірі партиясы өнімді таңбалау талаптарын бұзғаны үшін кері қайтарылды.
Самара облысынан Қызылорда облысына бағыт алған екі жүк көлігі 605 мың дана жұмыртқа тасымалдаған. Ветеринариялық бақылау кезінде өнімнің сыртқы қаптамасында таңбалау жапсырмалары жоқ екені анықталды.
Екі көлік те кері бағытқа жіберілді. Жүргізушілерге Қазақстан Республикасының Әкімшілік құқық бұзушылық туралы кодексінің 406-бабы бойынша әкімшілік хаттамалар толтырылып, айыппұл салынды.
Жүк тасымалдаушы өкілдеріне Қазақстанның және Еуразиялық экономикалық одақтың ветеринариялық-санитариялық заңнамасының талаптары түсіндірілді. Олардың қатарында Кеден одағы комиссиясының 2010 жылғы 18 маусымдағы № 317 «Еуразиялық экономикалық одақта ветеринариялық-санитариялық шараларды қолдану туралы» шешімі бар.
Жыл басынан бері өңірдің ветеринариялық бақылау бекеттерінде 294 заң бұзушылық тіркелген. Бақылау шаралары нәтижесінде 294 көлік кері қайтарылып, 147 адамға қатысты әкімшілік шаралар қолданылды.
Ауыл шаруашылығы министрлігі сыртқы экономикалық қызметке қатысушылар мен жүк тасымалдаушыларды ветеринариялық-санитариялық талаптарды сақтауға шақырды. Министрлік өнімді мемлекеттік шекара арқылы заңды өткізу үшін тиісті таңбалау мен ветеринариялық ілеспе құжаттар қажет екенін еске салды.
