Қаржылық мониторинг агенттігінің Алматы қаласы бойынша департаменті «Bal halal» ЖШС директорына қатысты ғылыми әзірлемелерді коммерцияландыруға бөлінген қаражатты жымқыру дерегі бойынша тергеуді аяқтады.
2023–2024 жылдары компания өсімдік шикізатынан инновациялық макарон өнімдері және микронутриенттермен байытылған ұн өндіруге арналған төрт жоба бойынша 1,15 млрд теңге қаржыландыру алған. Қаражат жабдық сатып алуға, өндіріс орындарын әзірлеуге, шикізат пен бөлшектер алуға, монтаждау және жөндеу жұмыстарына, дайын өнім шығаруды ұйымдастыруға арналған.
Тергеу эксперименттері кезінде сатып алынған жабдық жобаларда көзделген өнімді шығаруға мүмкіндік бермейтіні анықталған. Ақша шығару үшін үлестес тұлғаларға тіркелген «SMART 15» ЖШС пайдаланылып, жабдық пен басқа қызметтер үшін деген желеумен оның шоттарына 736,4 млн теңге аударылған.
