Абай атындағы Қазақ ұлттық опера және балет театрында КСРО және Қазақстанның халық әртісі, Қазақстанның Еңбек Ері Әлібек Дінішевтің 75 жылдығына арналған екі музыкалық кеш өтті.
Мерейтойлық бағдарлама Джузеппе Вердидің «Травиата» операсымен ашылды. Одан кейін гала-концертте қазақ әндері, романстар және әлемдік вокал классикасының туындылары орындалды.
Концерттің екінші бөлімінде Әлібек Дінішев Абайдың «Желсіз түнде жарық ай», Матвей Блантердің «За высокими горами», Агустин Лараның «Solamente una vez» және Жаяу Мұсаның «Ақ сиса» әндерін орындады. Сахнаға оның жиені Карина Абдуллина да шықты.
