Қазақстан Республикасының Қаржы нарығын реттеу және дамыту агенттігі Abu Dhabi Commercial Bank (Kazakhstan) АҚ-на банктік және өзге операцияларды жүргізуге әмбебап лицензия, сондай-ақ әмбебап лицензиясы бар банктің исламдық банктік операцияларын жүзеге асыруға лицензия берді.
Агенттік төрағасы Мадина Абылкасымова лицензияны Қазақстан қаржыгерлерінің конгресі аясындағы салтанатты рәсімде табыстады.
Abu Dhabi Commercial Bank (Kazakhstan) бір банк шеңберінде дәстүрлі және исламдық банктік қызметті қатар атқаруға, яғни «исламдық терезе» тетігін пайдалануға құқық алған Қазақстандағы алғашқы банк болды.
Дәстүрлі және исламдық банктік қызметті үйлестіруге 2026 жылғы 16 қаңтарда қабылданған «Қазақстан Республикасындағы банктер және банк қызметі туралы» жаңа заң мүмкіндік береді. Әмбебап банк клиенттерге жеке ислам банкін құрмай-ақ дәстүрлі өнімдер мен исламдық қаржыландыру қағидаттарына сай құралдарды ұсына алады.
Агенттік мәліметінше, бұл халық пен бизнеске қаржылық қызметтердің таңдауын кеңейтіп, елде исламдық қаржыландырудың дамуына ықпал етеді. Abu Dhabi Commercial Bank-тің Қазақстан нарығына шығуы банк секторындағы бәсекені кеңейту үшін шетелдік банктерді тарту жөніндегі Мемлекет басшысының тапсырмасы аясында жүзеге асырылып отыр.
Банктің лицензия алуы шетелдік капитал қатысатын жаңа банкті құру рәсімін аяқтап, оған Қазақстанда банк қызметін жүргізу құқығын береді. Агенттік халықаралық банктік топтың келуі бәсекені дамытуға, қызмет көрсету сапасын арттыруға және халық пен бизнестің қаржылық қызметтерге қолжетімділігін кеңейтуге жағдай жасайтынын атап өтті.
