Астанада есірткіге қатысты интернет-ресурстарды анықтау және бұғаттауға жіберу үшін жасанды интеллектке негізделген ақпараттық жүйе таныстырылды. Оны есірткіге қарсы іс-қимыл жөніндегі ведомствоаралық штаб отырысында көрсетті.
Жүйе интернетті өздігінен бақылайды, күмәнді материалдарды анықтап, мазмұнын талдайды және бұғаттауға жіберуге арналған материалдарды әзірлейді. Мамандар ақпаратты тексеріп, ресурстарды бұғаттауға жолдау туралы шешім қабылдайды.
Әзірлеушілердің айтуынша, бағдарлама ашық жарияланымдармен қатар қауымдастықтарды, боттарды және жабық интернет алаңдарын да талдай алады. Ол пайдаланушылар белсенділігі, сұранысқа ие есірткі заттары және заңсыз нарықтың таралу динамикасы туралы деректерді жинақтайды.
Таныстырылым кезінде жүйенің Астанадағы мониторинг нәтижелері көрсетілді: бір тәулікте есірткіге қатысты 79 материал, бір аптада 421, ал бір айда екі мыңнан астам материал анықталған. Көрсетілген материалдар таныстырылым кезінде әлі бұғатталмаған еді.
Отырыста есірткінің алдын алуға жұмсалатын қаражаттың тиімділігі және жастарға арналған шараларды нысаналы әрі қызықты ету мәселелері де талқыланды. Әсіресе оқушыларға, студенттерге және жастарға назар аудару қажеттігі айтылды.
Полиция дерегінше, 2026 жылдың басынан бері Астанада есірткінің заңсыз айналымына байланысты 884 құқық бұзушылық тіркелді. Тыйым салынған заттарды сатты деген күдікпен 359 адамға қатысты қылмыстық іс қозғалды, оның 10-ында кәмелетке толмағандар фигурант болған.
