Бұл туралы өңір басшысы Құмар Ақсақалов облыс әкімдігінде өткен кеңесте мәлімдеді. Жиында цифрландыру және жасанды интеллект саласындағы жұмыстың аралық қорытындылары шығарылып, алдағы міндеттер талқыланды.
Өңірдегі IT-компаниялар саны 2022 жылғы 318-ден 362-ге дейін көбейді. Сала мамандарының орташа жалақысы 2023 жылмен салыстырғанда бір жарым есеге жуық өсіп, биыл тамызда 467 мың теңге болды.
2025 жылы облыстағы қолма-қол ақшасыз төлем көлемі 3,1 трлн теңгеге жетіп, 2022 жылмен салыстырғанда 55%-ға артты. Жалпы төлемдердегі қолма-қол ақшасыз төлемдердің үлесі 2022 жылғы 74,8%-дан биыл 84,6%-ға дейін өсті.
Кәсіпорындар цифрлық технологияларға 2025 жылы 18,4 млрд теңге жұмсады. 2022 жылы бұл көрсеткіш 10 млрд теңгеден асқан. Биылғы бірінші жартыжылдықта осы мақсатқа 9,8 млрд теңге бөлінді.
Құмар Ақсақаловтың айтуынша, цифрлық сауаттылық деңгейі 2023 жылғы 82,9%-дан 2025 жылы 92,3%-ға өсті. PISA-2025 зерттеуінде қостанайлық оқушылар цифрлық тапсырмаларды шешу көрсеткіші бойынша республикада үшінші орын алды.
Өнеркәсіпті цифрландыру деңгейі бойынша Қостанай облысы Қазақстанда бірінші орында. Кәсіпорындардағы өнеркәсіптік роботтар саны 2023 жылғы екеуден үш жылда 150-ге жетті.
Агроөнеркәсіп кешеніндегі сүт фермаларында автоматтандырылған желілер мен цифрлық жүйелер енгізілді. Алдағы міндеттердің қатарында өсімдік шаруашылығында цифрлық шешімдерді кеңейту, ақылды суару жүйелерін енгізу және ұшқышсыз ұшу аппараттарын пайдалану бар.
