Алматыда тауда және басқа да қатынауы қиын жерлерде адасқан адамдарды іздеуге арналған AG Tag қауіпсіздік жүйесі әзірленіп, сыналып жатыр. SOS түймесі бар құрылғы координаттарды мобильді байланыс, SIM-карта және интернет болмаса да құтқарушыларға жеткізе алады.
Жобаны AG Digital KZ Алматы қаласының Цифрландыру басқармасының қатысуымен жүзеге асырып жатыр. Құтқару қызметтерінің дерегінше, Алматы тауларында жыл сайын 1 000-нан астам іздеу-құтқару жұмысы жүргізіледі. Көптеген туристік бағытта ұялы байланыс жоқ болғандықтан, көмекке мұқтаж адамдардың нақты орнын анықтау қиындайды.
AG Tag координаттарды спутниктік навигация көмегімен анықтап, радиоканал арқылы құтқару қызметінің базалық станциясына жібереді. Деректер әр екі секунд сайын жаңартылады. Төтенше жағдай кезінде турист SOS түймесін басып, дабыл сигналын жібере алады; зардап шеккен адамның координаттары кезекшінің электрондық картасында көрінеді. Қазіргі конфигурацияда сигнал 15 километрге дейін жеткізіледі.
Жүйе құрылғымен байланысты бақылауға және сигнал жоғалған жағдайда оның соңғы орналасқан жерін тіркеуге мүмкіндік береді. Базалық станция интернетке және мобильді желілерге қосылмай-ақ жұмыс істей алады. Жоба аясында туристерге жабдықты eGov Mobile қосымшасындағы QR-код арқылы беру механизмі де пысықталып жатыр: пайдаланушы маршрут пен қайту уақытын тіркеп, құрылғыны алып, жорықтан кейін қайтарады.
Алматының негізгі туристік бағыттарында жабдық беретін 12 пункт ашу жоспарланған. Олардың қатарында Алмарасан, Аюсай, Медеу, Қимасар, Көк-Жайлау, Бутаковка және Шымбұлақ бар.
Жүйе Алматының алты тау бағыты бойынша, соның ішінде Турист, Панорама, Букреев және Фурманов шыңдарының маңында, сондай-ақ Үлкен Алматы көлі ауданында сыналды. Тексерулер әртүрлі ауа райында, оның ішінде биік таулы жерлерде өтті. Алматының Құтқару қызметімен және Қазақстан Республикасы Төтенше жағдайлар министрлігінің Республикалық жедел-құтқару жасағымен бірлескен сынақтарда жүйенің жұмысқа қабілеттілігі расталды. Қазір әрі қарай сынауға арналған құрылғылардың алғашқы партиясы шығарылды.
2026 жылдың соңына дейін Алматы туристері мен альпинистік қауымдастықтарының қатысуымен пилоттық сынақ бастау жоспарланған. Жобаға Алматының Төтенше жағдайлар департаменті, альпинизм федерациясы және қаладағы визит-орталықтар қатысады. Болашақта технологияны Қазақстанның басқа туристік аймақтары мен қатынауы қиын жерлерінде қолдану көзделіп отыр.
