17 шілдеде Әзербайжан Премьер-министрі Әли Асадовтың төрағалығымен Министрлер кабинетінде 2029 жылы өтетін халық санағына дайындық мәселелері талқыланды.
Жиында Президент Илхам Әлиевтің 2026 жылғы 7 шілдедегі халық санағын өткізу туралы жарлығынан туындайтын міндеттер және дайындық кезінде атқарылатын жұмыстар қаралды.
Әли Асадов халық санағы демографиялық үдерістерді бағалау және елдің әлеуметтік-экономикалық дамуын жоспарлау үшін маңызды дереккөз екенін атап өтті. 2029 жылғы санақ Әзербайжанның бүкіл егемен аумағын қамтитын алғашқы жалпыұлттық санақ болады.
Үкімет жарлықты орындау жөніндегі іс-шаралар жоспарын бекітеді. Дайындық пен санақты өткізуге орталық және жергілікті атқарушы органдардың жұмысын үйлестіру үшін Премьер-министрдің орынбасары басқаратын орталық комиссия құрылады.
Санақты БҰҰ талаптары мен ұсынымдарына және ұлттық басымдықтарға сүйене отырып өткізу жоспарланған. Бұл ретте алғаш рет цифрлық технологиялар, әкімшілік деректер және геокеңістіктік ақпарат пайдаланылады.
Мемлекеттік статистика комитетінің төрағасы Азер Мұрсакулов дайындық жұмыстары туралы баяндады. Цифрлық даму және көлік министрі Рашад Нәбиев мемлекеттік органдардың ақпараттық жүйелеріндегі деректерді комитеттің базасына біріктіру жоспарын таныстырды.
Жиын соңында Әли Асадов мемлекеттік органдарға санаққа қатысты шараларды уақытында және сапалы орындау жөнінде тапсырма берді.
