3 қарашада Түрікмен халқының Ұлттық көшбасшысы, Түрікменстан Халк Маслахатының төрағасы Гурбангулы Бердымұхамедов АҚШ Мемлекеттік хатшысының Оңтүстік және Орталық Азия істері жөніндегі көмекшісі Пол Капурмен кездесті.
Капур АҚШ Түрікменстанмен ынтымақтастықты жүйелі дамытуға мән беретінін айтты. Ол Түрікменстан астанасының сәулеттік келбетіне тәнті болғанын жеткізіп, АҚШ президенті Дональд Трамптың жылы сәлемі мен ізгі тілектерін Бердымұхамедовке және президент Сердар Бердымұхамедовке жолдады.
Бердымұхамедов АҚШ президентіне жауап сәлемін жолдап, Капурдың сапары барысында түрікмен-америкалық саяси консультацияларға қатысатынын атап өтті. Ол консультациялар мемлекетаралық диалогты нығайтуға ықпал етеді деген сенім білдіріп, қонаққа нәтижелі келіссөздер мен сәтті сапар тіледі.
Кездесуде тараптар саяси диалог пен сыртқы саяси ведомстволар арасындағы байланыстарды, сондай-ақ сауда-экономикалық әріптестікті сөз етті. Түрікменстанда «Nicklaus Design», «John Deere», «Case New Holland» және «Boeing» компанияларымен көпжылдық ынтымақтастық тәжірибесі бар. Ашхабадта Түрікменстан–АҚШ Іскерлік кеңесінің кезекті отырысы жақында өтті.
Бердымұхамедов Түрікменстан энергия ресурстарын жеткізу бағыттарын әртараптандыру стратегиясын іске асырып жатқанын айтты. Ол Түрікменстан–Ауғанстан–Пәкістан–Үндістан трансұлттық газ құбыры жобасын жүзеге асырудағы АҚШ-тың қолдауы бағаланатынын атап өтті.
Сондай-ақ энергетика, көлік-логистика және мәдени-гуманитарлық байланыстар салаларындағы ынтымақтастық мүмкіндіктері талқыланды. Кездесу соңында тараптар ұзақ мерзімді әрі көпқырлы ынтымақтастықты одан әрі дамытуға дайын екенін растады.
