АҚШ-та аралық сайлау нәтижелері жарияланған түні көрермендер соңғы алты сайлау циклінде алғаш рет кабель арналарынан гөрі эфирлік тележелілерді көбірек таңдады. Nielsen дерегінше, сейсенбі күні прайм-таймда 13 эфирлік және кабель арнасындағы сайлау көрсетілімдерін 31,21 миллион адам көрген. 2022 жылғы аралық сайлауда бұл көрсеткіш 25,43 миллион болған.
Көрермендердің 57 пайызы — 17,79 миллион адам NBC, ABC, CBS, Univision, Telemundo және PBS желілерін тамашалаған. Кабель арналарын 13,42 миллион адам көрген. Төрт жыл бұрын көрермендердің 57 пайызы керісінше кабель арналарын таңдаған.
NBC прайм-таймда 6,74 миллион көрермен жинап, 2022 жылғы орташа көрсеткішінен екі еседен астам өсті. ABC көрермен санын 57 пайызға арттырып, 5,19 миллионға жеткізді. CBS-ті 2,76 миллион адам көрді — бұл 2022 жылмен салыстырғанда 8 пайызға көп. Univision 1,54 миллион, Telemundo 1,06 миллион, ал PBS шамамен 500 мың көрермен жинады.
CNN мен MS NOW көрсеткіштерін де 2022 жылмен салыстырғанда өсірді, ал Fox News көрермендерінің саны шамамен 3,5 миллионға азайды. Соған қарамастан, ол кабель арналардың арасында аз ғана басымдықпен көш бастады. Үш ірі эфирлік желі қосылып Fox News жоғалтқан көрермен санынан да көп аудитория жинады.
Рейтингтердің ауысуына кабельді теледидарға қосылған үйлер санының азаюы ықпал еткен болуы мүмкін. Кабель, спутниктік немесе YouTube TV және Hulu + Live TV сияқты цифрлық қызметтерді пайдаланатын үй шаруашылықтары қазір теледидары бар үйлердің 42,5 пайызын құрайды; төрт жыл бұрын бұл үлес 52,3 пайыз еді. Сондай-ақ Fox News-тің оңшыл ұстанымы мен республикашылдардың сайлаудағы шығыны арнаның көрсеткішіне әсер еткен болуы мүмкін, деп жазады The Hollywood Reporter.
NBC-дің сайлау түніне арналған Kornacki Cam тікелей трансляциясы сайлау туралы стримдердің арасында ең көп қаралды. Streams Charts мәліметінше, NBC News-тің YouTube арналарындағы трансляцияларды көру уақыты 4,39 миллион сағат болған. NBC News өкілі Марк Гринстайнның айтуынша, арнайы бағдарламалық жасақтама телетрансляция мен стримнің бір-біріне кедергі келтірмей қатар жүруіне мүмкіндік берген.
