Мексиканың Мерида қаласында 10 қарашада қазақстандық әнші Димаш Құдайбергеннің концерті қарсаңында оның әлемнің әр түкпірінен келген жанкүйерлері бас қосты. Dears Península de Yucatán фан-клубы ұйымдастырған кеш Қазақстан мен Мексика мәдениетін ұштастырды.
El Conquistador қонақүйінде өткен кездесуге әншінің ата-анасы Қанат және Светлана Айтбаевтар, сондай-ақ Қазақстанның Мексикадағы елшілігінің кеңесшісі Ерлан Құбашев қатысты.
Кеште қонақтар Юкатан түбегінің дәстүрлерімен танысып, «Майя жауынгерлерінің» өнерін және Carlos Acereto балет ұжымы орындаған ұлттық харана биін тамашалады. Жергілікті музыканттар мексикалық әндерді, соның ішінде «Bésame Mucho» туындысын орындады.
