Бір жарым тәулік жол жүріп, бірнеше әуе рейсін ауыстырған Димаш Құдайберген мен оның шығармашылық ұжымы Латын Америкасына жетті. Оларды алғаш қарсы алған қала — Мексиканың Юкатан штатының астанасы Мерида.
Мануэль Кресенсио Рехон атындағы халықаралық әуежайда жергілікті Dears қауымдастығы әншіні Юкатанға тән дәстүрмен қарсы алды. Аспаптық трио Мексика композиторларының танымал шығармаларын болеро стилінде орындады.
Меридада Димашты мұхит көрінісі бейнеленген баннерлермен, ақ гүлдермен және жанкүйерлер ұстаған көк қағаз жүрекшелермен қарсы алды. Жиналғандар әншінің Мексикаға қайта оралғанына қуанышты екенін білдірді.
