Астанада Қазақстан мен Қытайдың мәдениет жылының аяқталуына арналған салтанатты іс-шара өтті. Қалибек Қуанышбаев атындағы Қазақ ұлттық музыкалық-драма театрында екі ел өнерпаздарының концерті және тақырыптық көрме ұйымдастырылды.
Іс-шараға Қазақстанның мәдениет және ақпарат министрі Арман Қырықбаев, Қытайдың Қазақстандағы уақытша сенімді өкілі Чэн Кэфань, Қазақстан сыртқы істер министрінің орынбасары Арман Исагалиев, дипломатиялық корпус өкілдері және мәдениет қайраткерлері қатысты.
Арман Қырықбаев Қазақстан мен Қытай арасындағы мәдени байланыстардың маңызын атап өтті. Оның айтуынша, мәдениет жылы екі елдің гуманитарлық байланысына серпін беріп, бірлескен шығармашылық жобаларға жаңа мүмкіндіктер ашты. Министр бұл бастаманың аяқталуын жаңа жобалардың басталуы ретінде қарастыратынын айтты.
Чэн Кэфань мәдени-гуманитарлық байланыстарды одан әрі дамыту маңызды екенін атап өтті. Келесі жылы Қазақстан мен Қытай арасындағы дипломатиялық қатынастардың орнағанына 35 жыл толатынын айтып, Қытай тарапының мәдениет, туризм, жастар саясаты, ғылым және білім салаларындағы ынтымақтастықты тереңдетуге дайын екенін жеткізді.
Жыл ішінде Қазақстан мен Қытайда 40-қа жуық мәдени іс-шара өтті. Олардың қатарында Чжэцзян провинциясының музейіндегі «Ұлы даланың көшпенділер мәдениеті» көрмесі, Алматыдағы Шанхай көркем коллекциялар музейімен бірлескен көрме және Бейжіңде Домбыра күніне, Абай күніне және Жамбыл Жабаевтың 180 жылдығына арналған шаралар бар.
Бейжіңдегі Қазақстан мәдени орталығы Қытай жұртшылығын еліміздің мәдениетімен таныстыратын алаңға айналды. Жыл соңына дейін Астанада Қытай мәдени орталығын ашу жоспарланып отыр. Қазақстан мен Қытайдың мәдениет жылы 2026 жылғы 31 наурызда Бейжіңдегі гала-концертпен ашылған.
