Қазақстанның Молдовадағы елшісі Алмат Айдарбеков 5 қарашада Молдова Сыртқы істер министрлігінің Бас хатшысы Думитру Соколанмен кездесті.
Тараптар Қазақстан мен Молдова тәуелсіздігінің 35 жылдығына орай бір-бірін құттықтап, саяси диалогты нығайту, сауда-экономикалық байланыстарды дамыту және инвестициялық ынтымақтастықты кеңейту перспективаларын талқылады.
Айдарбеков сұхбаттасына Қазақстанның жаңа Конституциясының негізгі ережелері, Құрылтай сайлауының қорытындылары және мемлекеттік басқару жүйесіндегі өзгерістер туралы айтты. Сондай-ақ тәуелсіздік жылдарындағы ел жетістіктері мен алдағы даму басымдықтарын таныстырды.
Кездесуде Қазақстан Президенті Қасым-Жомарт Тоқаевтың халыққа Жолдауына да назар аударылды. Онда инфрақұрылымды ауқымды жаңарту, энергетикалық қауіпсіздікті қамтамасыз ету, цифрландыру және жасанды интеллектіні енгізу негізгі бағыттар ретінде аталды.
Соколан Қазақстанды жаңа Конституцияның қабылдануымен құттықтап, екіжақты күн тәртібіндегі мәселелер бойынша ашық диалогқа дайын екенін білдірді. Ол сауда және инвестициялық ынтымақтастықты кеңейтуге қызығушылық танытып, тиісті ведомстволар мен іскер топтар арасындағы тікелей байланысты нығайту мүмкіндіктерін талқылады.
Кездесу қорытындысында тараптар өзара тиімді байланыстарды нығайтуға және кеңейтуге ниетті екенін растады.
