Астанада ICAO Aviation Security Week 2026 аясында Қазақстанның Авиациялық әкімшілігі басшылығы және АҚШ Көлік қауіпсіздігі әкімшілігінің (TSA) өкілдері кездесті. Америкалық делегацияны авиация және халықаралық саясат мәселелері жөніндегі атқарушы директор Эрик Ятар басқарды.
Тараптар авиациялық қауіпсіздік бойынша екіжақты ынтымақтастықты нығайту, нормативтік және практикалық тәжірибе алмасу, сондай-ақ Қазақстан және АҚШ арасында тікелей әуе қатынасын ашуға дайындық мәселелерін қарады.
Кездесудің негізгі тақырыптарының бірі — қазақстандық тасымалдаушының АҚШ-қа рейстерді бастауына қажет қауіпсіздік талаптарын орындау болды. Қатысушылар Air Astana-ның авиациялық қауіпсіздік бағдарламасын әзірлеуді және тиісті рәсімдер бойынша TSA-мен өзара іс-қимылды талқылады.
АҚШ өкілдері тасымалдаушының қауіпсіздік бағдарламасын қарау, жолаушылар деректерін беру жүйелерінің TSA Secure Flight бағдарламасымен үйлесімділігін тексеру және рейстер басталғанға дейін әуежайдың авиациялық қауіпсіздігін бағалау кезеңдерін түсіндірді. Бұл жұмыстарды АҚШ Көлік министрлігі және Федералдық авиация әкімшілігінің (FAA) рәсімдерімен үйлестіру қажеттігі де айтылды.
Сондай-ақ әуежайды алдын ала тексерудің нәтижелері және TSA ұсынымдарын орындау жұмыстары талқыланды. Тараптар бағалауға дайындық кезінде ақпаратты уақытылы алмасу және мамандардың өзара іс-қимылы маңызды екенін атап өтті.
Қазақстан тарапы АҚШ-тың ұлттық авиациялық қауіпсіздік жүйесін ұйымдастыру тәжірибесін зерделеуге қызығушылық білдірді. TSA өкілдері АҚШ-тың осы саладағы нормативтік базасына жүйелі шолу ұсынуға болатынын хабарлады.
Тараптар жүк әуе тасымалы және жеткізу тізбектерінің қауіпсіздігі бойынша жалғасып жатқан ынтымақтастықты да қарады. Бұдан әрі жұмыс қажетті қауіпсіздік рәсімдерін орындауға, тәжірибе алмасуға және Қазақстан мен АҚШ арасында тікелей әуе қатынасын ашуға жағдай жасауға бағытталады.
