Қазақстан Үкіметі 2026–2029 жылдарға арналған ұшқышсыз жүйелерді дамыту жөніндегі кешенді жоспарды бекітті. № 898 қаулы 2026 жылғы 13 қазанда қабылданды.
Жоспар ұшқышсыз жүйелер саласындағы реттеуді біріздендіруге, цифрлық және физикалық инфрақұрылым құруға, отандық өндірісті ынталандыруға бағытталған. Оны іске асыруға 18 мемлекеттік орган, әкімдіктер, даму институттары және квазимемлекеттік компаниялар қатысады. Үйлестіру міндеті Жасанды интеллект және цифрлық даму министрлігіне жүктелген.
2029 жылға дейін ұшқышсыз авиациялық жүйелердің бірыңғай цифрлық платформасын және дрондардың әуе қозғалысын автоматты басқару жүйелерін енгізу жоспарланып отыр. Құжат өтінім беру, аппараттарды есепке алу және тіркеу, ұшу бағыттарын келісу қызметтерін бір цифрлық сервиске біріктіруді көздейді.
Жоспар отандық аппараттық бөлшектер мен қорғалған бағдарламалық қамтылымды өндіруді дамытуға басымдық береді. Сондай-ақ ұшқышсыз жүйелер саласында кемінде 1 000 маман даярлау, университеттермен және халықаралық технологиялық компаниялармен бірлесіп кемінде екі зерттеу орталығы мен зертхана құру көзделген.
Білім беру бағдарламаларын жаңарту, мектептерде авиамодельдеу кабинеттерін ашу және дрондарға арналған арнайы орталықтар арқылы операторларды сертификаттау қарастырылған. Дрондарды пайдалану мен айналымын бақылау жөніндегі мемлекеттік функциялардың бір бөлігін Ішкі істер министрлігіне беру де жоспарға енгізілген.
Жоспар ауыл шаруашылығы, энергетика, тау-кен металлургиясы, логистика, коммуналдық шаруашылық, төтенше жағдайларды бақылау және экология салаларында ұшқышсыз жүйелерді қолдану жолдарын әзірлеуді қамтиды. Сонымен бірге вертипорттар, дрон-порттар және автоматты зарядтау станциялары желісін дамыту, ал 2027–2028 жылдары ұшқышсыз жүк тасымалын сынақтан өткізу жоспарланған.
