Қазақстанның Дүниежүзілік сауда ұйымы жанындағы тұрақты өкілі Қайрат Торебаев Дүниежүзілік зияткерлік меншік ұйымының (ДЗМҰ) зияткерлік меншік және жасанды интеллект жөніндегі алғашқы жаһандық форумына жетекшілік етті. Форум 9–10 қарашада Швейцарияның Женева қаласында өтіп жатыр.
Форумға министрлер, ДЗМҰ-ға мүше елдердің мемлекеттік органдарының басшылары, халықаралық сарапшылар және технологиялық компаниялардың өкілдері қатысуда. Күн тәртібінде авторлық және патенттік құқықтарды қорғау, ғылым мен инновацияда жаңа технологияларды қолдану, сондай-ақ адамның дауысын, бейнесін және цифрлық тұлғасын қорғау мәселелері бар.
Форум аясында қазақ тілі жасанды интеллект көмегімен субтитр жасайтын эксперименттік жүйенің 20 тілінің қатарына алғаш рет қосылды. Бұл қазақстандық мамандарға талқылауларды мемлекеттік тілде нақты уақыт режимінде бақылауға мүмкіндік береді.
