Қазақстанның Жасанды интеллект және цифрлық даму министрлігі мен «Қазақтелеком» АҚ «Қазақстанның инклюзивті экономикасын жедел цифрландыру» жобасы аясында өзара іс-қимыл туралы меморандумға қол қойды.
Ынтымақтастықтың негізгі бағыты — ауылдық жерлердегі телекоммуникациялық инфрақұрылымды дамыту. Жоба бойынша елдегі 1000-нан астам ауылда талшықты-оптикалық байланыс желілерін салу көзделген.
Жоба қала мен ауыл арасындағы цифрлық алшақтықты азайтуға бағытталған. Байланыс инфрақұрылымы қашықтан білім алуға, мемлекеттік қызметтерді пайдалануға, кәсіпкерлікті дамытуға және цифрлық шешімдерді күнделікті өмірге енгізуге жол ашады.
Министрліктің Телекоммуникациялар комитетінің төрағасы Дамир Сейсембеков ауылдарда интернет пайдаланушыларға дейін оптикалық желілер тарту «Қолжетімді интернет» ұлттық жобасының негізгі міндеттерінің бірі екенін айтты. Оның сөзінше, «Қазақтелеком» магистральдық инфрақұрылымына жергілікті шағын және орта байланыс операторларының қол жеткізуі соңғы миля желілерін GPON технологиясымен жедел құруға мүмкіндік береді. Жоспарланған интернет жылдамдығы — кемінде 100 Мбит/с.
«Қазақтелеком» АҚ корпоративтік бизнес дивизионының бас директоры Асқар Қаиров сапалы интернет білім алуға, жұмыс істеуге және бизнес жүргізуге қажет екенін атап өтті.
Меморандум жобаға қатысушылардың жұмысын үйлестіруге негіз болады. Тараптардың бірлескен жұмысы Қазақстанның ауылдық аумақтарындағы байланыс инфрақұрылымын дамытуға бағытталған.
