Қазақстан Республикасы Сыртқы істер министрлігінде Қазақстан мен Германияның саяси консультацияларының кезекті раунды өтті. Қазақстан делегациясын Сыртқы істер министрінің орынбасары Арман Исагалиев, Германия делегациясын Федералдық сыртқы істер министрлігінің Азия және Тынық мұхиты департаменті директорының орынбасары, елші Йоахим Бертеле басқарды.
Тараптар екіжақты қатынастардың жай-күйі мен даму перспективаларын талқылап, Қазақстан Президенті Қасым-Жомарт Тоқаевтың 29–30 қыркүйекте Германияға жасаған ресми сапары барысында қол жеткізілген уағдаластықтарды іске асыруға назар аударды.
Арман Исагалиев ішкі саяси реформалар туралы айтып, жоғары және жоғары деңгейдегі байланыстардың белсенді қарқынына қанағаттанатынын білдірді. Ол түрлі салалардағы өзара іс-қимылды тереңдету және екіжақты жобаларды ілгерілету жөнінде ұсыныстар айтты.
Келіссөздерде өнеркәсіптік кооперация, маңызды шикізат материалдары, энергетика, көлік және логистика, цифрландыру және озық технологиялар мәселелері қаралды. Тараптар 2026–2028 жылдарға арналған өнеркәсіптік, технологиялық және шикізаттық ынтымақтастықты дамыту жөніндегі бірлескен Жол картасының орындалу барысын талқылады.
Сондай-ақ мәдениет, білім және ғылым салаларындағы гуманитарлық ынтымақтастықты, университетаралық байланыстар мен білікті кадрлар даярлауды кеңейту мәселелері сөз болды. Қазақстандағы неміс диаспорасының екі ел арасындағы достық қатынастарды нығайтудағы рөлі атап өтілді.
Тараптар «Орталық Азия – Германия» форматы, Еуропалық одақпен байланыс, БҰҰ және ЕҚЫҰ аясындағы өзара іс-қимыл, сондай-ақ өңірлік және халықаралық күн тәртібінің өзекті мәселелерін қарастырды.
Кездесу қорытындысында тараптар белсенді саяси диалогты жалғастыруға және өзара тиімді ынтымақтастықты кеңейтуге мүдделі екенін растады. 2027 жылы Қазақстан мен Германияның дипломатиялық қатынастарына 35 жыл толады.
