29 қазанда Қазақстан Республикасы Президентінің жанындағы Ұлттық ғылым академиясында Тәуелсіз Мемлекеттер Достастығына қатысушы мемлекеттер ғалымдарының VI форумы ашылды. Қазақстанда алғаш рет ұйымдастырылған халықаралық іс-шараға сегіз елдің ғылым академияларының басшылары, жетекші ғалымдар, ғылыми-зерттеу институттары мен жоғары оқу орындарының өкілдері қатысты.
Форум Ұлттық ғылым академиясының 80 жылдығына орай өткізіліп, «Жасанды интеллект дәуіріндегі ғылым: ынтымақтастық пен дамудың жаңа мүмкіндіктері» тақырыбына арналды. Қатысушылар — Қазақстан, Әзербайжан, Армения, Беларусь, Қырғызстан, Ресей, Тәжікстан және Өзбекстан өкілдері. Іс-шараның мақсаты — ғылыми интеграцияны нығайту, бірлескен зерттеулерді дамыту және Достастық елдерінің ғылыми-технологиялық әлеуетін ортақ міндеттерді шешуге жұмылдыру.
Қазақстанның ғылым және жоғары білім министрі Саясат Нұрбек құттықтау сөзінде жасанды интеллект ғылыми прогресс пен экономикалық өсудің маңызды факторына айналғанын атап өтті. Оның айтуынша, мемлекеттердің ғылыми әлеуетін біріктіру және халықаралық ынтымақтастықты дамыту технологиялық өзгерістер жағдайында ерекше маңызды.
