Қазақстан елшілігі 5 қарашада Бразилия Федералдық Сенатының шақыруымен «Әлемдік бейбітшілік» парламенттік тобының Консультативтік кеңесін құру рәсіміне қатысты.
Жаңа бастамаға сенатор Пауло Паим төрағалық етеді. Кеңестің атқарушы хатшысы әрі «Қазақстан – Бразилия» достық форумы президенті болып бұрынғы сенатор Улиссес Риделл тағайындалды.
Топ халықаралық диалог пен ынтымақтастықты нығайту, бейбітшілікті, әлеуметтік әділеттілікті және адам құқықтарын қолдау, орнықты дамуға жәрдемдесу және әлеуметтік теңсіздікті азайту мәселелеріне тұрақты назар аударуды көздейді.
Бастама аясында Қазақстанға Консультативтік кеңес құрамына кіру ұсынылды. Бразилия тарапы мұны Қазақстанның жаһандық қауіпсіздікке, ядролық қарусыздануға және дінаралық әрі өркениетаралық диалогқа қосқан үлегін мойындау деп бағалады.
Рәсімде Қазақстанның Кеңес Одағы тарағаннан кейін мұраға қалған ядролық арсеналдан өз еркімен бас тартқаны және 1991 жылы Семей ядролық полигонын жапқаны атап өтілді.
Сондай-ақ Астанада тұрақты өтетін Әлемдік және дәстүрлі діндер лидерлерінің съезінің түрлі конфессиялар, мәдениеттер мен халықтар арасындағы диалогты дамытудағы рөлі айтылды. Бразилия тарапы Қазақстанның кеңеске қатысуы парламенттер арасындағы байланыстарды кеңейтіп, екіжақты ынтымақтастық пен ортақ бастамаларға мүмкіндік береді деп санайды.
