Қазақстан Ғылым және жоғары білім министрлігі Лондонда өткен London FWD шарасында Coursera Learning Excellence Award халықаралық сыйлығымен марапатталды. Іс-шараға Coursera және Udemy білім беру технологиялары платформалары, сондай-ақ Еуропа, Таяу Шығыс және Африка елдеріндегі серіктестер қатысты.
Сыйлық Қазақстанға халықаралық онлайн оқытуды жоғары білім жүйесіне енгізу, цифрлық құзыреттерді және жасанды интеллект саласындағы дағдыларды дамыту жетістіктері үшін берілді. Қазақстан Coursera платформасымен 2022 жылы ынтымақтастықты бастаған.
Министрлік мәліметінше, Coursera бастамасы қазақстандық жоғары оқу орындарының студенттеріне мыңдаған халықаралық онлайн курс пен кәсіби сертификаттау бағдарламаларына қол жеткізуге мүмкіндік берген. Қазір 292 мыңнан астам білім алушы платформа сертификаттарын алған, сертификаттардың жалпы саны 682 мыңнан асады.
