Қазақстанның Ғылым және жоғары білім министрлігі NVIDIA компаниясымен жасанды интеллект және жоғары өнімді есептеулер саласында мамандар даярлау бойынша ынтымақтастығын дамытып жатыр. Бағыттардың бірі — қазақстандық жоғары оқу орындарының оқытушыларын NVIDIA Deep Learning Institute (DLI) халықаралық бағдарламалары бойынша даярлау.
Жоба аясында NVIDIA DLI сертификаты бар оқытушы-амбассадорлар желісін құру көзделген. Олар компанияның халықаралық бағдарламалары бойынша сабақ өткізіп, ресми оқу және зертханалық материалдарды пайдаланады және университеттерде студенттердің жасанды интеллект саласындағы құзыреттерін дамытуға атсалысады.
23 қазанда Астанада Ғылым және жоғары білім министрі Саясат Нұрбек NVIDIA негізін қалаушы және бас директоры Дженсен Хуангпен кездесті. Министр Қазақстанның жасанды интеллект саласындағы әлеуетін, жоғары білімнің цифрлық трансформациясы нәтижелерін және физикалық жасанды интеллектіні (Physical AI) дамыту бастамасын таныстырды.
Physical AI — жасанды интеллект пен нақты физикалық әлеммен әрекеттесетін жүйелер тоғысындағы бағыт. Бұл технологиялар роботтарды оқытуға, өндірістік үдерістерді модельдеуге, инженерлік шешімдерді виртуалды ортада сынауға және өнеркәсіп нысандарының цифрлық егіздерін жасауға мүмкіндік береді. Оларды тау-кен өндірісінде, энергетикада, көлікте және басқа салаларда қолдануға болады.
Бағдарламаның пилоттық кезеңіне Қазақстанның 12 техникалық жоғары оқу орны қатысады. Төрт оқытушы NVIDIA DLI амбассадоры мәртебесін алып, халықаралық сертификаттарға ие болды. Компанияның оқу материалдарын пайдаланып студенттерді оқыту да басталды. Сертификат алған оқытушылар DLI бағдарламалары бойынша практикалық сабақ өткізіп, білімін студенттерге үйрете алады.
Жинақталған тәжірибені кеңейтіп, бағдарламаға 100-ден астам университетті тарту жоспарланып отыр. Бастамалардың бірі — Qazaq AI Research University (QAIRU) базасында NVIDIA Physical AI Hub өңірлік орталығын құру ұсынысы. Орталықта физикалық жасанды интеллект шешімдерін әзірлеу және сынау үшін білім беру мен зерттеу мүмкіндіктерін біріктіру көзделеді.
Студенттер мен зерттеушілер NVIDIA Omniverse және Isaac технологияларын цифрлық егіздер жасауға, өндірістік үдерістерді модельдеуге, робот жүйелерін сынауға және өндірістік міндеттерге арналған инженерлік шешімдерді әзірлеуге пайдалана алады. Орталық құрылымына оқытушыларды NVIDIA DLI бағдарламалары бойынша даярлау және сертификаттау алаңын, университет зертханаларын, сондай-ақ жаңа технологияларды әзірлеу және сынау инфрақұрылымын енгізу ұсынылып отыр.
Орталықтың ықтимал жұмыс бағыттарына өнеркәсіп, энергетика және көлікке арналған цифрлық егіздер, робот техникасы және автономды жүйелер кіреді. Оны құрудың ұйымдастырушылық форматы мен ынтымақтастық шарттарын NVIDIA компаниясымен бірлесіп пысықтау жоспарланған.
