Қазақстан Республикасы Сауда және интеграция министрлігінде Сауда және интеграция мәселелері жөніндегі Қоғамдық кеңестің биылғы қорытынды отырысы өтті. Қатысушылар электрондық сауданы дамыту, цифрлық қызметтердің бірыңғай өңірлік нарығын қалыптастыру және ішкі әуе тасымалындағы баға белгілеудің ашықтығын талқылады.
Отырыс Арман Шаккалиев пен Қоғамдық кеңес төрағасы Руслан Шаекиннің төрағалығымен өтті. Оған мемлекеттік органдардың, салалық қауымдастықтардың және бизнес өкілдері қатысты.
Күн тәртібіндегі негізгі мәселелердің бірі қазақстандық және шетелдік маркетплейстер үшін тең бәсекелестік жағдайын қамтамасыз ету болды. Ұлттық статистика бюросының дерегінше, 2025 жылы бөлшек электрондық сауданың көлемі 3,77 трлн теңгеге жетіп, 19,4%-ға өскен. Қатысушылар салық салуды жетілдіру, кедендік бақылау және шекарааралық сатып алуда тұтынушылар құқығын қорғау жөніндегі ұсыныстарды қарады.
Сондай-ақ Қазақстан, Өзбекстан, Қырғызстан, Әзербайжан және Түрікменстанның бірыңғай цифрлық нарығын құру бастамасы талқыланды. Шекарааралық есеп айырысуды жеңілдету, электрондық құжаттарды өзара тану және IT-компаниялардың жұмысына қолайлы жағдай жасау ұсынылды.
Қоғамдық кеңес мүшесі Марлен Смаилов ішкі рейстерге арналған әуе билеттері құнының қалай қалыптасатыны ашық болу керегін көтерді. Талқылау қорытындысы бойынша Сауда министрлігінің Тұтынушылардың құқықтарын қорғау комитетіне Көлік министрлігімен және Бәсекелестікті қорғау және дамыту агенттігімен бірлесіп билеттер құнына мониторинг жүргізу және тарифтердің қалыптасу тетіктерін зерделеу ұсынылды.
Сондай-ақ әуе билеттері бағасының күнтізбесін және құн өзгергені туралы хабарламаларды енгізу мүмкіндігін қарау ұсынылды. Барлық бастама мен ұсынымды тиісті мемлекеттік органдар пысықтайды, ал олардың іске асырылуы Қоғамдық кеңестің бақылауында болады.
