Қазақстанның сауда және интеграция министрі Арман Шаккалиев Астанадағы Stadler Kazakhstan зауытына барып, CHARME жолаушылар вагондарын өндірудің жергіліктендірілуімен және отандық өндірістік базаның дамуымен танысты.
Министрге кәсіпорынның өндірістік қуаттары мен технологиялық үдерістері таныстырылды. Вагон кузовтары экструдталған алюминий профильдерінен жасалады. Өндірісті одан әрі жергіліктендіру аясында Қазақстанда өндірілген алюминийді пайдалану көзделген. Бұл отандық шикізатты өңдеуді кеңейтіп, дайын өнімдегі қазақстандық материалдардың үлесін арттыруға мүмкіндік береді.
Астанадағы зауыт Винтертурдан (Швейцария) кейін Stadler арбаларын шығаратын әлемдегі екінші өндіріс орны болды. Өндірісті жергіліктендіру швейцариялық компанияның технологиялық құзыреттері мен өндірістік тәжірибесін Қазақстанға берудің бір бөлігіне айналды.
CHARME вагондары Қазақстанның климаттық жағдайында пайдалануға арнайы әзірленген және -40-тан +45 °C-қа дейінгі температураға есептелген. Кузов ені 3 метрден асады, биіктігі — 4,7 метрге дейін, ұзындығы — 26 метрден артық. Ең жоғары пайдалану жылдамдығы — сағатына 160 шақырым, қызмет ету мерзімі — 40 жыл.
Арман Шаккалиев жолаушылар вагондарын өндіруде халықаралық стандарттарды қолданудың маңызын атап өтті. Оның айтуынша, олар отандық өндірушілер үшін бағдар болып, өнім сапасын арттыруға, өндіріс үдерістерін жетілдіруге және оларды халықаралық талаптарға сәйкестендіруге ықпал етуі керек.
Кеше Stadler-дің алғашқы жолаушылар вагондары Астана — Алматы бағытына шықты. «Жолаушылар тасымалы» АҚ бүгінге дейін 100-ден астам вагон қабылдады. Келісімшартта 2030 жылға дейін 557 жолаушылар вагонын кезең-кезеңімен жеткізу және кейін сервистік қызмет көрсету қарастырылған.
