Қазақстанның Стратегиялық жоспарлау және реформалар агенттігінің Ұлттық статистика бюросы жаңартылған «Талдау» ақпараттық-талдамалық жүйесінде AI TALDAU интеллектуалды көмекшісін іске қосты. Оның көмегімен статистикалық деректерді сұрауға, өңірлер көрсеткіштерін салыстыруға және олардың өзгерісін талдауға болады.
Пайдаланушы қажетті ақпаратты диалог форматында сұрай алады. Көмекші тиісті көрсеткіштерді тауып, деректерді салыстырады, динамикасын көрсетеді және негізгі үрдістерді анықтауға көмектеседі. Нәтижелер кестелер, графиктер, диаграммалар және талдамалық материалдар түрінде беріледі; сұрауды нақтылап, қосымша мәлімет алуға болады.
AI TALDAU қазақ, орыс және ағылшын тілдерін қолдайды. Дайын материалдарды PDF, Word, PowerPoint және Excel форматтарында сақтауға болады.
