Құрманғазы атындағы Қазақ ұлттық халық аспаптар оркестрі Алматыда «Әлем таныған әсем топ» атты концерт берді. Бағдарлама ұлттық музыкалық мұраны сақтау және насихаттауға арналды.
Концертте оркестрдің қалыптасуына елеулі үлес қосқан Махамбет Бөкейханов, Науша Бөкейханов, Лұқпан Мұхитов және Қамбар Медетовтің шығармашылық мұрасына ерекше назар аударылды. Биыл ұжым негізін қалаушылардың бірі Қамбар Медетовтің туғанына 125 жыл толады.
Оркестр Құрманғазы, Дәулеткерей, Есжан, Абыл, Арынғазы, Қауен және Үсентөренің шығармаларын, сондай-ақ халық күйлерін орындады. Бағдарламаға Мұхиттың әндері және қазақ халық әндері де енді.
