Мексиканың Нуэво-Леон штатындағы Монтеррей қаласында қазақстандық әнші Димаш Құдайбергенге арналған мурал салынды. Туынды жергілікті жанкүйерлердің бастамасымен жасалған.
Жобаны Dimash&DearsRegiasMty фан-клубының мүшелері Мексиканың Dears por Dimash альянсының қолдауымен жүзеге асырды. Муралдың авторы — Antonio Art Mural деген шығармашылық есіммен танымал суретші Антонио.
Димаштың бейнесі Монтеррей орталығындағы Francisco Javier Mina 1140, Centro мекенжайында орналасқан. Жанкүйерлер қауымдастығының өкілдері мурал әншінің шығармашылығына деген ризашылықты және Мексика мен Қазақстан арасындағы мәдени байланысты білдіретінін айтты.
