Қаржылық мониторинг агенттігінің Алматы қаласы бойынша департаменті тұтыну кооперативі атын жамылған «R.O.I.» қаржы пирамидасын құру және басқару дерегі бойынша тергеу жүргізіп жатыр.
Азаматтарды жылжымалы және жылжымайтын мүлік сатып алу бағдарламаларына қатысуға шақырып, пай жинақтау шарттарын жасаған және олардан ақша жарналарын қабылдаған. Тергеу мәліметінше, жаңа қатысушылардан түскен қаражат нақты кәсіпкерлікке емес, бұрын қосылған пайшылар алдындағы міндеттемелерді орындауға бағытталған.
Қазір 275 азамат жәбірленуші деп танылды. Оларға келтірілген жалпы шығын 217 млн теңге деп бағаланды.
Тергеу нұсқасына сәйкес, ұйымдастырушылар кооперативтен 94 млн теңгені, оның ішінде «Кәусар» ЖК шоттарына, консультациялық қызметтер үшін төлем ретінде аударған.
2022 жылы сот даулары басталғаннан кейін Алматыда «ShynSaulet», «Berekeli Shanyrak», «Aya-Aru», «Jasmin», «USCoop» және «Baiterek» атты алты жаңа тұтыну кооперативі құрылған. Тергеу мәліметінше, олар «R.O.I.» басшысының бақылауында болып, негізгі кооперативтің жеке сот орындаушылары бұғаттаған банк шоттарын айналып өтіп, ақшаны басқа бағытқа аудару үшін пайдаланылған.
Сот санкциясымен үш автокөлікке, 25 пәтерге және банк шоттарына тыйым салынды. Қаржы пирамидасын ұйымдастырды деген күдікке ілінген адам екі ай мерзімге қамауға алынды. Тергеу жалғасып жатыр.
