Қазақстанда республикалық «Оқитын ұлт» марафоны жалғасып жатыр. Жоба басталғалы қатысушылар әлеуметтік желілерге оқыған кітаптары туралы 55 мыңнан астам видео пікір жариялады.
Марафонға елдің барлық өңірінен оқушылар, студенттер, мемлекеттік қызметшілер және кәсіпорындар мен ұйымдардың қызметкерлері қосылды. Олар оқыған шығармаларынан алған әсерімен бөлісіп, кітаптардың көзқарасы мен күнделікті өміріне ықпалы туралы айтады.
Қатысушылар кітапты оқып, жазбаша пікір дайындағаннан кейін ашық әлеуметтік желідегі парақшасына қысқа видео жариялай алады. Модераторлар мақұлдаған әр видео пікірге 50 балл есептеледі.
Абай облысы бойынша Экономикалық тергеу департаментінің қызметкері Марат Сеильханов «Оқитын мемлекеттік қызметші» санатына қатысып жүр. Ол В. Чан Ким мен Рене Моборнның «Көк мұхит стратегиясы» және Генри Киссинджер, Дэниел Хаттенлокер мен Эрик Шмидттің «Жасанды интеллект және адамзаттың жаңа дәуірі» кітаптары туралы пікір білдірді.
Қостанай облысындағы Kia Qazaqstan зауытының қызметкері Искандер Испамбетов «Оқитын зияткер» санатына қатысады. Ол Уильям Голдингтің «Шыбындар әміршісі» және Юваль Ной Хараридің «XXI ғасырға арналған 21 сабақ» шығармалары туралы видео пікір жазды.
Марафон аясындағы видео пікірлер қатысушыларға кітап ұсынуға, оқығаны туралы пікір алмасуға және жаңа оқырмандарды тартуға мүмкіндік береді.
