Темір ауданында «Елге құрмет – ерге міндет» атты облыстық ақындар айтысы өтті. Ол Республика күніне және Қазақстан Республикасы Тәуелсіздігінің 35 жылдығына арналды.
Айтысқа Ақтөбе облысының қалалары мен аудандарынан 12 ақын қатысып, екі кезеңде өнер көрсетті. Олар тәуелсіз Қазақстанның жетістіктері мен болашағын, халық бірлігін, ұлттық құндылықтарды, қазақ тілі мен мәдениетін, туған өлкенің тарихын және Темір өңірінің өткені мен бүгінін жырлады. Сондай-ақ ауыл өмірі, жастардың болашағы және қоғамдағы өзекті мәселелер көтерілді.
Айтысты темірлік ақын, Халықаралық ақындар айтысы одағының Ақтөбе облыстық филиалының төрағасы, жыршы және термеші Марат Ахметов жүргізді. Қатысушылардың өнерін Оралбай Қаметияұлы, Орал-Қосай Байсенгір, Жұлдыз Қожабекова, Аян Сейітов және Ершат Қайболдин бағалады.
