Оңтүстік Кореяның сыртқы істер министрі Чо Хён екі елдің экономикалық қауымдастықтарын жастар арасындағы алмасуды жандандыруға белсенді атсалысуға шақырды. Бұл туралы ол 22 қазанда Корея мен Жапонияның бизнес ұйымдары бірлесіп өткізген 33-ші екіжақты бизнес конференциясының қарсы алу кешіне жолдаған құттықтау сөзінде айтты. Министрдің сөзін сыртқы істер министрінің екінші орынбасары Ким Джина оқыды.
Конференцияны Корея кәсіпкерлер федерациясы және Жапония бизнес федерациясы ұйымдастырады. 1982 жылы құрылған бұл жеке сектордың жоғары деңгейдегі ынтымақтастық алаңы екі ел арасындағы достық пен экономикалық ынтымақтастықты талқылайды. Биылғы конференция 23 қазанда FKI Tower ғимаратында «Жаңа 60 жылдың бастауы: Корея-Жапония экономикалық ынтымақтастығының жаңа көкжиегі» тақырыбымен өтеді.
Чо Хённың айтуынша, Ли Чжэ Мён үкіметі қызметіне кіріскеннен кейін белсенді шаттл-дипломатияға сүйенген екіжақты байланыстар тұрақты даму жолына түсті. Ол екі елдің жеткізу тізбектері, экономикалық қауіпсіздік, энергетика мен ресурстар, озық өндіріс және ғылым мен технология салаларында нақты ынтымақтастықты ілгерілетіп жатқанын атап өтті.
