Өзбекстан Президентінің ПП-393 қаулысында Қарақалпақстанның 2027 жылы әлеуметтік-экономикалық дамуының негізгі мақсаттары белгіленді. Жалпы өңірлік өнімді 108%-ға, өнеркәсіп өндірісін 107%-ға, нарықтық қызметтер көлемін 117%-ға арттыру жоспарланған.
Сондай-ақ ауыл шаруашылығы өнімін 105%-ға және құрылыс жұмыстарының көлемін 113%-ға ұлғайту көзделген. Экспортты 550 млн АҚШ долларына дейін жеткізіп, инвестициялардың жалпы көлемін екі есе арттырып, 5 млрд долларға дейін жеткізу жоспарланып отыр.
Алғашқы кезеңде табысы төмен 125 мың отбасының 513 мың мүшесін жалақысы жоғары жұмыс орындарына орналастыру көзделген. Жасыл энергетиканы дамыту арқылы көміртек бірліктерін экономикалық активке айналдыру, ауыл шаруашылығы айналымына 17 мың гектар жер енгізу және шөлді аумақтарда 20 мың гектарға мал азықтық дақыл өсіру де жоспарға енген.
Нүкіс қаласындағы «Жолшылар» махалласының «Ашшиколь» аумағында 270 гектарда 50 мың тұрғынға арналған «Nukus City» заманауи тұрғын үй кешені салынады. Жоба озық сәулет шешімдері мен энергия тиімді технологияларды қолдануды қарастырады.
Кешеннің жобасын үш ай ішінде әзірлеу жоспарланған. «Жаңа Ташкент» жобасының тәжірибесі мен шетелдік ұйымдардың ұсынымдары ескеріліп, заманауи сәулет шешімдері бар бас жоспар жасалады.
Жобада көпқабатты үйлер, сауда және бизнес орталықтары, қонақүйлер, саябақтар, жасыл аймақтар, субұрқақтар, спорт алаңдары және әлеуметтік нысандар салу көзделген. «Ақылды қала» тұжырымдамасы, баламалы энергия көздері, смарт-технологиялар және экологиялық тұрақты әрі климатқа бейімделген құрылыс шешімдері қолданылмақ.
«15 минуттық қала» қағидаты негізінде қоғамдық көлік пен экологиялық таза көлік қозғалысын ұйымдастыруға жағдай жасалады. «Qoraqalpog‘iston Invest kompaniyasi» АҚ-ның қатысуымен Нукістің реновация аймақтарынан тұрғындарды кезең-кезеңімен көшіру үшін кешенде тұрғын үйлер салу қарастырылған.
