Өзбекстан президенті Шавкат Мирзиёев 4 қарашада елге ресми сапармен келген Тәжікстан Республикасы Жоғарғы жиналысы Маджлиси милли төрағасы Рустами Эмомалимен кездесті.
Тараптар өзбек-тәжік достығы, тату көршілік, стратегиялық әріптестік және одақтастық қатынастарын, соның ішінде екі ел парламенттері арасындағы байланысты одан әрі дамыту мәселелерін талқылады.
Кездесуде өзара сауда мен жүк тасымалы көлемі өсіп жатқаны, өнеркәсіп, құрылыс, энергетика, ауыл шаруашылығы және электротехника салаларындағы бірлескен жобалар жүзеге асырылып жатқаны айтылды. Бірлескен инвестициялық компания жұмыс істеп тұр.
Астаналар мен өңірлер арасындағы тікелей байланыстарды, сондай-ақ мәдени-гуманитарлық, білім беру және туристік алмасуларды кеңейту қажеттігі атап өтілді.
Заң шығарушы органдардың жоғары деңгейдегі уағдаластықтар мен бірлескен бастамаларды ілгерілетудегі рөлін арттыруға назар аударылды. Бұл үшін парламенттік комиссиялар, достық топтары және бейінді комитеттердің жұмысын жандандыру ұсынылды.
Кездесу соңында Шавкат Мирзиёев Рустами Эмомалиге екі ел арасындағы стратегиялық әріптестік пен одақтастықты нығайтуға және парламентаралық диалогты дамытуға қосқан үлесі үшін «Фидокорона хизматлари учун» орденін табыстады.
