Абай облысының әкімі Берік Уәли Ақсуат ауданының Екпін ауылындағы «Мәуліт» шаруа қожалығына барып, 5 мың бас жас ірі қараға арналған бордақылау алаңының жұмысымен және шаруашылықтың өндірістік мүмкіндігімен танысты.
Қожалық 2007 жылы құрылған. Биыл Екпін ауылдық округіне қарасты Қазанғап учаскесінде 5 мың басқа арналған бордақылау алаңы пайдалануға берілді. Қазір мұнда 4 мың бұқа бордақыланып жатыр. Мал Ақсуат ауданының тұрғындары мен ауыл шаруашылығы тауарын өндірушілерден сатып алынады. Бұл жергілікті мал өсірушілерге төлін тиімді бағамен өткізіп, қосымша табыс табуға мүмкіндік береді.
Шаруашылықта қазақтың ақбас тұқымды 5 135 асыл тұқымды малы бар. Материалдық-техникалық базасында 8 ауыл шаруашылығы техникасы, 10 қосалқы жабдық, 2 тиегіш және 2 «КамАЗ» жүк көлігі бар. Мұнда 25 адам тұрақты жұмыс істейді, маусым кезінде тағы 10 адам тартылады. Қожалық мемлекеттік субсидиялау бағдарламаларына да қатысады.
