Air Astana және China Southern Airlines стратегиялық әріптестік туралы келісімге қол қойды. Ол Қазақстан және Қытай арасындағы әуе қатынасын нығайтып, жолаушыларға сапардың қолайлы әрі алуан түрлі нұсқаларын ұсынуға бағытталған.
Келісімге қол қою рәсіміне ҚР көлік вице-министрі Талғат Ластаев, Air Astana компаниясының серіктестік және альянстар жөніндегі вице-президенті Ричард Леджер, China Southern Airlines атқарушы вице-президенті Цзэн Юнчао және авиация саласының өкілдері қатысты.
Бұл — екі елдің әуе компаниялары арасындағы алғашқы стратегиялық әріптестік. Ол қолданыстағы код-шеринг ынтымақтастығын дамытудың жаңа кезеңіне жол ашып, коммерциялық байланыстарды тереңдетуге негіз болады.
Әуе компаниялары рейстер кестесін үйлестіріп, код-шеринг қызметтерін кеңейтеді және бірлескен маркетингтік бастамаларды жүзеге асырады. Олардың мәліметінше, бұл жолаушыларға ыңғайлы ауысулар мен Қазақстан, Қытай және одан тыс бағыттарға кеңірек қолжетімділік беруге мүмкіндік туғызады.
Талғат Ластаевтың айтуынша, екі ел арасындағы рейстер саны 2025 жылдың сәйкес кезеңімен салыстырғанда 52%-ға өскен. 2026 жылдың басынан бері бір миллионнан астам жолаушы тасымалданған, ал Көлік министрлігі Қытаймен бағыттар санын 30-ға дейін көбейтуді жоспарлап отыр.
Air Astana Астана және Алматы қалаларынан Үрімшіге, Бейжіңге, Гуанчжоуға және Шанхайға ұшады. Қарбалас маусымда компания аптасына 36-ға дейін тұрақты барып-қайту рейсін орындайды. China Southern Airlines Үрімші, Бейжің, Гуанчжоу және Сианьнан Алматы мен Астанаға аптасына 29-ға дейін рейс ұсынады.
Әріптестік Қазақстан және Қытай арасындағы іскерлік, туристік, білім алу және отбасылық сапарларды дамытуға, сондай-ақ екі ел арқылы басқа қалаларға ұшатын жолаушылар үшін транзит мүмкіндіктерін кеңейтуге бағытталған.
