Ақтөбе халықаралық әуежайында жаңа ұшу-қону жолағын салу және жолаушылар терминалын реконструкциялау жоспарланған. Жұмыстар 2029 жылға дейінгі Қазақстан әуежайларын дамытудың үш жылдық бағдарламасы аясында жүргізіледі.
Жаңғырту әуежайдың өткізу қабілетін арттырып, әуе қатынасын одан әрі кеңейтуге мүмкіндік береді.
Жобалардың іске асырылу барысы Қазақстан Республикасы көлік вице-министрі Талғат Ластаевтың төрағалығымен өткен кеңесте талқыланды. Оған әкімдіктер мен ел әуежайларының өкілдері қатысты.
Қатысушылар ұшу-қону жолақтарын салу және реконструкциялау, жолаушылар терминалдарын жаңарту, жобалық-сметалық құжаттама әзірлеу, қаржыландыру көздерін анықтау және белгіленген мерзімдерді сақтау мәселелерін қарады.
Елдегі жеті әуежайда ұшу-қону жолақтарын жаңғырту көзделген. Ақтөбеден бөлек, Астана және Шымкент әуежайларында жаңа жолақ салынады, ал Алматы, Жезқазған, Тараз және Орал әуежайларындағы қолданыстағы жолақтар реконструкцияланады.
Ақтөбе әуежайынан бөлек, тағы алты әуежайда жолаушылар терминалдарын салу немесе реконструкциялау жоспарланған. Олар — Атырау, Өскемен, Жезқазған, Семей, Павлодар және Үржар әуежайлары.
Көлік инфрақұрылымын дамыту Мемлекет басшысының 2026 жылғы 28 қазандағы Қазақстан халқына Жолдауында белгіленген.
