Қазақстан Көлік министрлігі ақылы автожолдар желісін кеңейтеді: қайта жаңартылған «Ақтөбе – Қандыағаш» жолының 11-ден 100-шақырымға дейінгі бөлігі «Қандыағаш – Мақат» ақылы трассасының құрамына кіреді.
11-ден 87-шақырымға дейінгі учаскеде барлық көлік түрі, соның ішінде жеңіл автомобильдер үшін төлем алынады. 87-ден 100-шақырымға дейінгі бөлікте және «Қандыағаш – Мақат» трассасының қалған аумағында тек автобустар мен жүк көліктері төлейді.
Жол жүру құны жүріп өткен қашықтыққа, көлік санатына, жүк көтергіштігіне және төлем тәсіліне байланысты болады. Іргелес аудандар тұрғындарына жеңілдікпен абонементтер қарастырылған.
