Алматы облысындағы салық төлемі ең жоғары он кәсіпорын биылғы жылдың қаңтар-қыркүйек айларында бюджетке 395,34 млрд теңге аударды. Бұл кәсіпорындарда 6 871 адам жұмыс істейді, олардың 90%-ы — облыс тұрғындары.
Ең көп салық төлеген Philip Morris Kazakhstan компаниясы болды: Іле ауданындағы кәсіпорын тоғыз айда 163,04 млрд теңге аударған. JTI Kazakhstan 129,95 млрд теңгемен екінші орынға шықты. Үшінші орында Қарасай ауданында орналасқан Coca-Cola Almaty Bottlers компаниясы — 62,31 млрд теңге.
Төртінші орынға «Galanz bottlers» акционерлік қоғамы (20,12 млрд теңге) жайғасты. Компания 1998 жылдан бері алкогольсіз сусындар, бөтелкедегі су және қаптама өнімдерін шығарады. RG Brands Kazakhstan 7,48 млрд теңгемен бесінші болды.
Алтыншы орында — гипсокартон мен құрылыс қоспаларын өндіретін Knauf Gypsum Kapchagai (3,14 млрд теңге). Одан кейін «Маревен Фуд Тянь-Шань» (3,1 млрд), FoodMaster (2,4 млрд), «Шин-Лайн» және «БЕНТ» (әрқайсысы 1,9 млрд теңге) тұр.
Өткен жылы он ірі кәсіпорын 1 148,504 млрд теңгенің өнімін өндіріп, бюджетке 453,06 млрд теңге салық төлеген. Өнім Қазақстан нарығына және Ресейге, Тәжікстанға, Беларуське, Моңғолияға, Қырғызстанға, Өзбекстанға және басқа елдерге жеткізілген.
Алматы облысы биыл салықтар мен басқа да міндетті төлемдер есебінен мемлекеттік бюджетке 1,5 трлн теңге түсіруді жоспарлап отыр. Өткен жылы өңір бюджетке алғаш рет 1,1 трлн теңгеден астам қаражат түсірген: республикалық бюджетке 490,5 млрд, жергілікті бюджетке 628,6 млрд теңге.
