2026 жылдың тоғыз айында Астана кәсіпорындары 3,1 трлн теңгенің өнімін өндірді. Бұл өткен жылдың сәйкес кезеңімен салыстырғанда 11,6%-ға көп, деп хабарлады қала әкімдігінің ресми сайты.
Елорда өнеркәсібінің 94,9%-ы өңдеу секторына тиесілі. Негізгі бағыттар — металлургия, машина жасау, құрылыс материалдары мен азық-түлік өндірісі.
Индустриялық парк № 1-де 145 жоба жүзеге асырылып жатыр: 103 кәсіпорын жұмыс істеп тұр, тағы 42-сі іске асырылу кезеңінде. 30-дан астам өндіріс шетелдік инвестицияның қатысуымен құрылып жатыр.
Елорданың арнайы экономикалық аймақтары кәсіпорындарында 7 мыңнан астам тұрақты жұмыс орны ашылған. Жаңа жобалар аясында тағы шамамен 2,5 мың адамды жұмысқа орналастыру жоспарланған.
Индустриялық парк № 2-де 2029 жылға дейін 100-ден астам өндіріс орнын орналастыру көзделген. Бұл жерде 8 мыңнан астам жаңа жұмыс орны ашылады деп күтілуде.
Шағын және орта бизнесті қолдау үшін елордада үш шағын өнеркәсіптік аймақ жобасы жүзеге асырылды. Кәсіпкерлерге 20 мың шаршы метрден астам өндірістік және қойма алаңы берілді.
Байқоңыр ауданының Өндіріс тұрғын алабында 87,8 гектар жерге Аграрлық-индустриялық аймақ құру жоспарланған. Онда тамақ өнеркәсібінің 20-дан астам жобасын жүзеге асыру көзделіп отыр.
