Астанада қоғамдық көлікте жолақы желтоқсанның ортасынан бастап қолма-қол ақшасыз төлем кезінде 150 теңге болады. Қазір бір сапардың құны — 110 теңге.
Қала әкімдігінің мәліметінше, жолақы 2014 жылы 90 теңге болып белгіленіп, содан бері бір рет қана қайта қаралған. Осы уақыт ішінде тасымалдаушылардың жанармайға, қосалқы бөлшектерге, жаңа автобустарға және жүргізушілердің еңбекақысына жұмсайтын шығындары өскен.
Атап айтқанда, дизель отынының литрі 2014 жылғы шамамен 107 теңгеден қазір 329 теңгеге дейін қымбаттаған. Жүргізушілердің орташа жалақысы 2014 жылы 100–150 мың теңге болса, қазір автобус класы мен жұмыс режиміне қарай 700 мың теңгеден басталады.
Соңғы үш жылда тасымалдаушылар заманауи қауіпсіздік, жайлылық және экологиялық талаптарға сай 1127 жаңа көлік сатып алған. Қалада бірқатар санаттағы тұрғындарға тегін жүру құқығы сақталады.
Тегін жүру құқығы Ұлы Отан соғысының ардагерлері мен мүгедектеріне және оларға теңестірілген адамдарға, зейнет жасындағы зейнеткерлерге, көпбалалы аналар мен отбасыларға, мүгедектігі бар адамдарға және 18 жасқа дейінгі мүгедектігі бар балаларға, сондай-ақ олардың бір ата-анасына (заңды өкіліне) беріледі. 1986 жылғы 17–18 желтоқсан оқиғаларына қатысқан және саяси қуғын-сүргін құрбандары ретінде ақталған адамдар да осы тізімге кіреді.
Астанада оқитын 18 жасқа дейінгі балаларға 2020 жылғы наурыздан бері тегін жүру мүмкіндігі берілген. Әкімдік тарифтің өсуін пайдалану шығындарының артуымен, көлік жұмысының тұрақтылығын қамтамасыз ету, автобус паркін жаңарту және маршрут желісін дамыту қажеттілігімен түсіндірді.
