Өзбекстан президенті Шавкат Мирзиёев Бұхара қаласында салынып жатқан конгресс-холл және заманауи қонақүйлердің құрылыс барысымен танысты.
Жобалар қалада жоғары деңгейдегі халықаралық форумдар, кездесулер мен конференциялар өткізуге мүмкіндік береді. Өзбекстанда шетелдік туристер саны артып келеді: 2025 жылы бұл көрсеткіш 2016 жылмен салыстырғанда шамамен алты есе, ал туристік қызметтер экспорты 11 есе өскен.
Құны 60 миллион доллар болатын конгресс-холлдың жалпы ауданы 14,5 мың шаршы метрді құрайды. Негізгі бетондау жұмыстары аяқталған, сыртқы инженерлік желілерді тарту, қасбеті мен шатырын салу жалғасып жатыр.
Осы аумақта құны 37 миллион долларлық Hilton Garden Inn қонақүйі де салынып жатыр. Жеті қабатты ғимарат 212 нөмірге есептелген, жерасты тұрағы болады. Негізгі қаңқасы дайын, ішкі қабырғаларын тұрғызу, инженерлік желілерді тарту және қасбетін әрлеу жұмыстары жүріп жатыр.
Тағы бір жоба — құны 39,6 миллион доллар болатын Holiday Inn қонақүйі. Ол да жеті қабатты, 212 нөмірлі болады. Қонақүйдің жанында екі қабатты бизнес-орталық салынып жатыр. Қонақүйде шатыр орнату және ішкі қабырғаларды тұрғызу жұмыстары жалғасуда, бизнес-орталықтың жерасты бөлігінде бетондау аяқталуға жақын.
Мирзиёев жобалар Бұхарада халықаралық іс-шараларды өткізуге және туристік қызмет түрлерін кеңейтуге маңызды екенін айтты. Ол құрылыс жұмыстарын сапа талаптарын қатаң сақтай отырып, уақытында аяқтауды тапсырды.
