Өзбекстан президенті Шавкат Мирзиёев Бұхара қаласында салынып жатқан жаңа туристік орталықтың құрылыс барысымен танысты. Жоба тарихи мұраны заманауи қызметтермен ұштастырып, қалада ірі халықаралық мәдени және іскерлік іс-шаралар өткізуге жағдай жасауға бағытталған.
50 гектар аумақты алатын жобаға жалпы 105 миллион доллар инвестиция салу жоспарланған. Мұнда қабылдау үйі, көрме залы, музей, екі қонақүй, 80 отбасылық қонақ үйі, 2 мың орындық амфитеатр және 70-тен астам сауда мен қызмет көрсету нысаны салынады.
Жобада серуендеу аймақтары, қолөнер орталықтары және жасанды көл де қарастырылған. Ғимараттардың сәулетінде Бұхара дәстүрлері мен заманауи шешімдерді үйлестіру көзделген.
Қазір 10 гектар аумақта инженерлік-коммуникациялық желілер тартылып жатыр. Жұмысқа 50-ге жуық арнайы техника жұмылдырылған.
Орталық толық іске қосылғаннан кейін 2 мың жұмыс орны ашылып, Бұхараға келетін туристер саны 2 миллион адамға артады деген болжам бар. Есеп бойынша, жергілікті бюджетке жыл сайын 288 миллиард сум түсуі мүмкін.
Президент жобаның мақсаты жаңа нысандар салумен шектелмей, Бұхараның тарихи мұрасын кеңінен таныту және тұрғындарға туризмнен жұмыс пен табыс әкелу екенін атап өтті. Ол жауапты тұлғаларға жобаны осы мақсаттарға сай жүзеге асыруды тапсырды.
Сондай-ақ мемлекет басшысы 2027 жылы өткізу жоспарланған саммиттерге Бұхара инфрақұрылымын дайындау жөніндегі баяндамаларды тыңдап, тиісті тапсырмалар берді.
